War Saxaafadeed ay Soo Saartay Beesha JAARSO

Subject : War saxaafadeed ay soo saartay beesha JAARSO

October 16, 2011

Ururka Dhalinyarada Qurbo Joogta Beesha JAARSO Ee Waqooyiga America.

War saxaafadeed ay soo saareen jaaliyadda JAARSO ee Waqooyiga America:



KU: Madaxweynaha DDS – Ethiopia, Cabdi Muxumed Cumar
KU: Baarlamaanka DDS – Ethiopia
KU: Dhamaan Salaadiinta/Ugaasyada beelaha Soomaaliyeed ee dega kililka 5aad
Sida akhristoow laga yaabo inaad ka warhaysid ba waxaa dabayaaqadii sanadkii tegay yimid carrigan Maraykanka gaar ahaana magaalada Minneapolis, Minnesota (USA) madaxweynaha imika talada haya ee dowlad deegaanka Soomaalida Ethiopia (DDS) mudane Abdi Mohamud Omer iyo wafti uu hogaaminayay isagoo markaas socdaalkiisu ahaa sidii uu wada tashiyo ula samayn lahaa qurbo joogta deegaanka Soomali galbeed kasoo jeeda ee guud ahaan Maraykanka jooga, gaar ahaana kuwo ku nool gobolka Minnesota oo ah sida la sheego halka qudha ee shacabka Soomaali galbeed ku badan yihiin.

Hadaba socdaalkii Mudane Abdi Mohamud Omer iyo waftigii uu hogaaminayay waxaa si diiran loogu soo dhaweeyay dalka Maraykanka gaar ahaana magaalada Minneapolis oo ahayd halka uu shirweynuhu ka dhacay, maalin uun kadib markii shirku dhacay ayuu madaxweyne Omer bilaabay inuu beel –beel ula kulmo beelaha kasoo jeeda Soomaali Galbeed ama Soomaalida Ethiopia. Beesha JAARSO waxay ka mid ahayd beelihii la kulmay madaxweynaha iyo waftigii uu hor kacayay waagaas. Waxaan kala hadalnay sidii beesha JAARSO xaqii ay kililka 5aad ku lahaayeen loo siin lahaa. Hadii aan nahay aqoonyahankii, culumaa’udiinkii iyo waxgaradkii qurbo joogta beesha JAARSO ee Waqooyiga America waxaan aad ula yaabnay sida xaqdarada ah ee loo dhisay maamulka degmada Tuli – Guuleed oo ahayd XUNDHURTII beesha JAARSO.
Waxaa isweydiin mudan yaa u qalma in lasiiyo jago gudoomiye ama badhasaab?. Jawaabtu waxa weeyaan had-ba beeshii ubadan deegaan ahaan. Maadaama sida caadiga ah marka degmo maamul loo dhisayo ay tahay in shacabka degmada degan afti laga qaado si’ay codkooda u dhiibtaan.. Balse nasiib darro taasi inay dhacdo iska daaye, odayaashii beesha waa loo caga jugleeyay waxaana loogu hanjabay haday juuq yidhaahdaan inay xabsiyada ku qudhmi doonaan. Waxaa intaas dheer in iyadoon afti laga qaadin shacabkii ku dhaqnaa degmada Tuli ayay mas’uuliyiintii kililku maamul usameeyeen degmadii. Taasi waxaan u aragnaa cabudhis iyo xoog loo sheeganayo beesha JAARSO.



Sidaan wada ogsoonahay beesha JAARSO xaqii ay ku lahayd DDS dhexdeeda kama aysan helin. Taniyo labaatankii sano ee lasoo dhaafayna waa la duudsinayay. Intaas waxaa u dheer in la gacan bidixaynayo iyadoo loo aanaynayo berri bay ismaamulka OROMIA naga raaceen. Waxaase akhristoow wax lala yaabo ah inaan horta la is warsan maxaa Degmada JINACSANI ku kalifay inay ku biirto maamulka OROMIA? Jawaabtu waxa weeyaan sidan.
Dhariga maxaa karka ka keena? Waa kulaylka.
Taariikhda dib ha loogu laabto, cashuurtii Degmada JINACSANI laga qaadi jiray waagaas taliskii xukumaayay wakhtigaas si badheedha ayuu Gobolka Ji-Jiga u geysan jiray, iyadoon shacabka JINACSANI waxba loo hambayn!
Adeegyadii daruuriga ahaa ee markaas degmadu ubaahnayda waxba looma qaban, iska daa in dariiqyo loo dhiso ama dugsiyo loo sameeyee. Xitaa taliskii DDS waagaas umuu san quudhin in degmada JINACSANI loo aqoonsado degmo maadaama ay tahay degmo ay hoos yimaadaan in kabadan 30 tuulo.
Annagoo intaas oo dulmi nalagu sameeyay ayaa imikana waxaa kuwaas oo dhan kasii daran in Dawlad Deegaanka Soomaalida – Ethiopia (DDS) ay xidheen labo wiil oo dhalinyaro ah oo garab rarato oo kasoo jeeda beesha JAARSO. Waxaa lakala yiraahdaa labada wiil ee sida xaqdarada ah lagu xidhay
Ahmed Daahir iyo Abdiwahab Hussein Laag. Taasoo imika mudo bil iyo hal todobaad laga joogo qiyaastii ay ku xidhan yihiin mid kamida jeelasha Ji-Jiga. Iyadoon wax maxkamada la horkeenin. Tani waa cadaalad darro! Mid ay beesha JAARSO aqbali kartana maaha. Waxaan codsanaynaa in si bilaa shuraad ah lagu sii daayo innamadaa sida sharci darrada ah lagu xidhay.

Waxaan ilo lagu kalsoon yahay ka helnay in sababta loo xidhay lagu xidhiidhinayo war saxaafadeed ay beesha JAARSO soo saartay bil ka hor, oo ay xaqeedii ku doonaysay. Warsaxaafadeedkaasi muusan ahayn mid shakhsi, beel ama dowlada kililka 5aad wax udhimaayay. Balse waxa uu ahaa mid beesha JAARSO ay xaqeeda ka maqan ay ku weydiisanaysay.


Waxaan mar labaad xasuusiinaya madaxweyne Abdi Muhumed Omer iyo xakuumada uu madaxda ka yahay in hadii aan wiilasha beesha JAARSO kasoo jeeda aan sida ugu dhakhsaha badan jeelasha Ji-Jiga looga soo daynin, inaan kalsoonidii iyo taageeradii aan u haynay DDS aan kala laaban doono si deg-deg ah. Ugu danbayntii hadii aan jawaab deg-deg ah ka wayno DDS, waxaa qurbo joogta beesha JAARSO ee USA iyo Europe ka go’an in ay xaqooda ka raadin doonaan dowlada FEDERAL – ka Ethiopia, warbaahinada caalamka ee afka – Soomaliga ku hadlana ay cabashadooda u gud-bin doonaan.

Ugaas Said Ugaas Ahmed Ali Ibrahim
Af-hayeenka qurbo joogta beesha JAARSO
E-mail: ducoqabe2001@yahoo.com
Tel: 011-612-454-0308 (USA)